ہزارہا مرحلوں سے دنیا حقیقتوں سے مکر گئی ہے

صداقتوں سے نظر چرا کے یقیں کی حد سے گزر گئی ہے

تراش کر سیکڑوں بہانے خرد کو گمراہ کر گئی ہے

حقیقتوں سے مکر کے دنیا فریب دیتی ہے آگہی کو

یقیں کی حد سے گزر کے انساں سیاہ کہتا ہے روشنی کو

خرد کی گمراہیاں ہمیشہ تباہ کرتی ہیں زندگی کو

فریب خوردہ ہے آگہی تو عبادتوں کا اصول ہی کیا

سیاہ ہو جائے روشنی تو لطافتوں کا اصول ہی کیا

تباہ ہو جائے زندگی تو ریاضتوں کا اصول ہی کیا

عبادتوں کا اصول یہ ہے، شعور ایماں کا معترف ہو

لطافتوں کا اصول یہ ہے دماغ عرفاں کا معترف ہو

ریاضتوں کا اصول یہ ہے عمل نگہباں کا معترف ہو

یہ التفاطِ شعور و ایمان نفس کو دیتا ہے پارسائی

یہ ارتباطِ دماغ و عرفاں نظر میں بھرتا ہے کبریائی

عمل نگہبانیوں میں پل کر خودی کی کرتا ہے رہنمائی

اگر نفس میں ہے پارسائی تو تخت و تاج و سپاہ کیا ہے

اگر نظر میں ہے کبریائی تو عظمتِ عز و جاہ کیا ہے

اگر خودی حق پہ گامزن ہے تو سطوتِ کج کلاہ کیا ہے

یہ تاج و تخت و سپاہ تنکا جو اڑ رہا ہو ہوا میں پیہم

یہ عظمتِ عزّوجاہ ذرّہ جو پس رہا ہو قدم سے ہر دم

یہ سطوتِ کج کلاہ کانٹا جو چبھ کے ہو ناخنوں سے برہم

ایک ایسا تنکا لکھا ہے کوفہ سے آیا تھا کربلا میں

زمانہ گزرا ایک ایسا ذرّہ قدم سے لپٹا تھا کربلا میں

ہوئے بہت دن ایک ایسا کانٹا دلوں میں کھٹکا تھا کربلا میں

جو رخ زمانے کا پھرتے ہوں وہ ایک تنکے کا کیا کریں گے

جو دل پہاڑوں کا چیرتے ہوں وہ ایک زرّے سے کیا ڈریں گے

جو خوں بہاروں کو بخشتے ہوں وہ ایک کانٹے سے کیا مریں گے